Monday, November 27, 2006

ப்ளாக்கர் பீட்டா?

இன்றைக்குப் ப்ளாக்கரில் பதிவிடும் பலர் மனதிலும் இருக்கும் முக்கியமான கேள்வி, பீட்டாவுக்கு மாறலாமா கூடாதா என்பது தான். பீட்டா ஒரு பூதம் மாதிரி பயமுறுத்தவும் செய்கிறது, அதன் அழகான புதிய வார்ப்புருக்கள் "வா, வா" என்று மோகினியாக அழைக்கவும் அழைக்கிறது. பீட்டாவின் நன்மை தீமைகளைப் பட்டியலிடுவது மட்டுமே இந்தப் பதிவின் நோக்கம்.

பீட்டாவா? அப்படீன்னா?

இன்னும் முழுமையாக உருவாக்கப்படாத மென்பொருளின் சோதனை வடிவத்தைத் தான் பீட்டா என்று அழைக்கிறோம். யாஹூ பீட்டா, கூகிள் குழும பீட்டா, ப்ளாக்கர் பீட்டா, எல்லாமே இந்தக் குடும்பத்தைச் சேர்ந்தவை தான்.

உருவாக்கமே முடியாத நிலையில் இது போன்ற மென்பொருள்களைப் பயனர்களுக்குத் தருவதில் என்ன பயனிருக்கப் போகிறது?

ஒவ்வொரு மென்பொருளாக்கத்துக்கும் பல நிலைகள் உள்ளன. முதலில், மென்பொருளுக்கான பயன்களுக்குத் தகுந்தாற்போல், அதை வடிவமைப்பது, அதன்பின், நிரலி எழுதுவது, கடைசியாக நிரலி வேண்டிய வகையில் செயல்படுகிறதா என்று அறிய அதனைச் சோதிப்பது. பிளாக்கர் போன்ற இலவச மென்பொருள்களைச் சோதிக்கும் பொழுது, அதன் இலவச பயனர்களையே இந்த வேலையைச் செய்ய உதவி கோருவது வழக்கம். இலவசமாக பிளக்கரைப் பயன்படுத்தும் நமக்குத் தானே, அதனை எந்தெந்த விதங்களில் எல்லாம் பயன்படுத்துகிறோம் என்று முழுமையாகத் தெரியும்?

உதாரணமாக, கூகிள் நிறுவனத்தில் வேலை செய்யும் சோதனைப் பொறியிலாளர்களில் எத்தனை பேர் யூனிக்கோடு முறையில் தமிழ் எழுதப் போகிறார்கள்? எத்தனை பேர் பிளாஷ் போன்ற மென்பொருளையோ, வீடியோ, ஆடியோ துண்டுகளையோ உள்நுழைக்க முயலப் போகிறார்கள்?

இவை எல்லாவற்றையும், இன்னும் அதிகமாகவும் நம் போன்ற பயனர்கள் இந்த மென்பொருளைச் சோதிக்க முடியும் என்பதால், கொஞ்சம் பயன்படுத்தக் கூடிய வடிவத்துக்கு வரும் போது இது போன்ற மென்பொருட்களுக்கு பீட்டா என்ற பாகத்தை உருவாக்கி அதனைச் சோதிப்பதில் நமது உதவியை நாடுகிறார்கள்.

பீட்டா - ப்ளாக்கரை விட எந்தெந்த வகையில் வசதியாக இருக்கிறது?
1. லேபிள்கள்
புதிய பீட்டா ப்ளாக்கரின் மிக முக்கியமான வித்தியாசம், அதன் லேபில்கள். கூகிள் மடல்கள் போலவே ஒவ்வொரு இடுகைக்கும் ஒரு வகைப்பெயர் கொடுத்து வகைப்படுத்தலாம். தமிழ்மணத்தின்/தேன்கூட்டின் வகைகளை விட, புதிது புதிதாக நமக்கு நாமே வகைப் பெயர்களை உருவாக்கிக் கொள்ளும் வசதியைக் கொடுக்கிறது இந்த லேபில்.
லேபிளை வைத்து இடுகைகளைத் தேடவும் செய்யலாம். வோர்ட்பிரஸ்ஸின் வகைகள் போலவே இந்த லேபில்கள் உதவுகின்றன.

2. வேகமான செயல்பாடு
புகைப்படங்கள், ஒளிப்படங்களின் வலையேற்றம் வழக்கமான பிளாக்கர் வலையேற்றத்தை விட மிக மிக வேகமாக உள்ளது. இப்போதைய பிளாக்கரின் புகைப்படங்கள் எக்ஸ்புளோரர் வழியாக வலையேற்றும்போது சிலசமயம் படமே வலையேறுவதில்லை. பீட்டாவில் இந்தப் பிரச்சனைகள் இப்போது இல்லை.

3. பதிவுகளின் வார்ப்புரு
வார்ப்புருவை மிக மிகச் சுலபமாக மாற்ற முடிகிறது. பழைய பதிவுகள், லேபில்கள், பதிவர் விவரங்கள், இன்னும் ஒவ்வொரு விஷயத்தையும் தனித் தனியாக எடுத்துப் பதிவில் சேர்த்துக் கொள்ளலாம். நிரலி முறை வார்ப்புருக்களாக இல்லாமல் நாமே நம் கையால் ஒவ்வொரு பெட்டியாக இழுத்து, எடுத்து ஆங்காங்கே சேர்த்துக் கொள்ளலாம்.

4. தனிப்பட்ட பதிவுகள்.
பதிவுகள், இடுகைகள் என்பவையே ஒவ்வொருவருக்குமான டைரி என்ற அளவில் நடைமுறைக்கு வந்த விஷயங்கள் தாம். வீட்டுக்குள்ளேயே தத்தம் டைரிகளை எழுதிக் கொண்டிருந்தவர்களுக்கு வசதியாக தனிப்பக்கம் போட்டு எழுத வழிவகுக்கிறது பீட்டா பிளாக்கர். இந்தப் பக்கங்களைப் பிறர் பார்க்காமல் மறைத்துவைக்க முடியும். நமது நண்பர்கள் மட்டும் பார்க்குமாறு வசதி செய்யவும் முடியும். இவ்வாறு தனிக் குழும வேலைகளுக்கும் இந்த பதிவுகள் பயன்படும்

5. மற்ற பதிவர்களுக்கு நம் பதிவுப் பெட்டிகள்
நம் பதிவில் சின்னச் சின்னப் பெட்டிகள் உருவாக்கி மற்ற பதிவுகளில் தெரியுமாறு கொடுக்கலாம். இதன் மூலம், உங்கள் பதிவைப் பற்றிய சிறு விளம்பரமோ, பதிவரைச் சார்ந்த விவரங்களோ எதையாவது மற்ற பதிவுகளிலும் இடம்பெறுமாறு செய்யலாம்.

6. நிறம் மற்றும் எழுத்துருக்கள்
தமிழ் எழுத்துக்களைப் பொறுத்தவரை இந்தப் பொதுவான எழுத்துருக்கள் எத்தனை தூரம் பயனுள்ளதாக இருக்கும் என்று புரியவில்லை. ஆனால், வார்ப்புருக்களில் ஆங்கில எழுத்துக்களுக்கான எழுத்துருக்களை நாமே பார்த்துப் பார்த்துத் தேர்ந்தெடுக்கலாம். வார்ப்புருவில் நிரலிப் பயன்பாட்டால், நிறங்களுக்கு எண்களை மட்டுமே தரவேண்டிய கட்டாயத்தை நீக்கிவிட்டு, பார்க்கும் நிறத்தை நாமே தேர்ந்தெடுக்கும் வசதியையும் பீட்டா வழங்குகிறது.

7. சேமித்தவுடனே பார்க்கக் கூடிய மாற்றங்கள்
இதுவரை பதிவுகளிலோ, நிரலியிலோ மாற்றங்களைச் செய்துவிட்டுப் பார்க்கக் காத்திருப்பது போல் அல்லாமல், வார்ப்புருவில் ஏதேனும் மாற்றங்களைச் செய்து, சேமித்தாலே பதிவில் தெரியவைக்கிறது பீட்டா பிளாக்கர்.

8. ஒருமுகப் பயனர்/கடவுச்சொல்
பிளாக்கர், கூகிள் குழுமங்கள், கூகிள் ரீடர், கூகிள் பேஜ் கிரியேட்டர், என்று எல்லா கூகிள் சேவைகளுக்கும் ஒரே பயனர்/கடவுச்சொல் பயன்பாட்டைக் கொண்டுவந்திருக்கிறார்கள். இதன்மூலம் உங்களின் மின்மடல் முகவரியைக் கொண்டே எல்லாவித சேவைகளிலும் பதிந்து கொள்ளலாம்.

பீட்டா - சறுக்கும் இடங்கள்:
1. இப்போதைய ப்ளாக்கரிலிருந்து பதிவுகளைப் பீட்டாவுக்கு மாற்றும் பொழுது, மறுமொழிகளில் உள்ள பயனர் பெயர்கள் தமிழில் இருந்தால் அவை பூச்சிகளாகத் தெரிகின்றன.

2. இட்லிவடை போல் புதுப் பக்கத்தில் பின்னூட்டப்பெட்டி திறக்கும் பதிவுகளில் தமிழில் எழுதுவது மிகமிக மெதுவாக இருக்கிறது. கிவியன் போல் அதே பக்கத்தில் திறக்கும் பதிவுகளில் கூட பின்னூட்டத்தைப் பார்ப்பதே ரகசியகாப்பு ஒப்பந்தத்தை முறிப்பது என்பது போல் கேள்வி கேட்டுக் கொடுமைப்படுத்துகிறது வலையுலாவி.

3. பீட்டாவின் நிரலி புரிந்து கொள்வதற்குச் சுலபமாக இல்லாத காரணத்தால் அதில் மாற்றம் செய்யவேண்டுமானால், கொஞ்சம் நேரம் செலவழிக்க வேண்டியதிருக்கும்.

4. இது தவிர இன்னும் அதிக பிரச்சனைகள் ஒவ்வொரு நாளும் கண்டுபிடிக்கப்பட்டு அவை களையப்படுகின்றன. இந்தத் தளத்தில் பீட்டாவின் தற்போதைய பிரச்சனைகள் மட்டும் பட்டியலிடப்பட்டுள்ளன - தீர்வு கண்டாயிற்றா இல்லையா என்ற விளக்கங்களுடன்.

5. மின்மடல் முகவரி தான் பயனர் பெயர் என்று தெரியும்போது, கடவுச்சொல்லை உடைக்க முயற்சி செய்பவர்களுக்கு இன்னும் வசதியாகப் போய்விடும் அபாயம் உள்ளது. அத்தனை சீக்கிரம் செய்வது இயலாது என்ற போதிலும், இப்படி ஒரு குறுக்கு வழிப் பிரச்சனையையும் நாம் பேசத் தான் வேண்டியுள்ளது.

பீட்டாவுக்கு எப்படி மாறுவது:

"பீட்டாவுக்கு மாறிப் பாருங்களேன்" என்ற சுட்டி ஒன்று நீங்கள் பிளாக்கர் கணக்கில் உட்புகுந்ததும் கேட்கப்படும். ஆம் என்றால், சில மணிநேரங்களில் உங்கள் பதிவுகள் பீட்டாவுக்கு மாற்றப்பட்டுவிடுகின்றன.

அதன்பின் தமிழ்மணத்தின் பட்டியை மீண்டும் சேர்ப்பதிலிருந்து பல்வேறு வேலைகள் துவங்குகின்றன. தமிழ்மணத்தில் சேர்க்க இந்தப் பதிவின்படி செய்ய வேண்டும். ஒரு முறை செய்துவிட்டால் நினைவில் வைத்துக் கொள்கிறது பீட்டா, அதன் பின் வார்ப்புருக்களை மாற்றி விளையாடினாலும், தமிழ்மணத்துக்காகச் சேர்த்த நிரலி மறைவதில்லை. தமிழ்மணம், இது போல் மாறி வந்த பீட்டாப் பதிவுகளை ஏற்க மறுத்து சிலசமயம் மக்கர் செய்தால், அதே தளத்தில் முறையிட்டால் சரி செய்து விடுகிறார்கள்.

எனக்கு மட்டும் ஏன்?
பீட்டாவுக்கு மாறுங்கள் என்ற சுட்டி உங்கள் பிளாக்கர் கணக்கில் தெரியவில்லையா, கவலை வேண்டாம். உங்கள் பதிவைப் பீட்டா சோதனைக்கு உரிய பதிவாக இன்னும் தேர்ந்தெடுக்கவில்லை என்று பொருள்.


இதற்குப் பல்வேறு காரணங்கள் சொல்லப்படுகின்றன:

  1. பிளாக்பிளஸ் எனப்படும் பிளாக்கரால் பல நாட்களுக்கு முன் தரப்பட்ட ஒரு அப்டேட்டை நீங்கள் வைத்திருக்கிறீர்கள்.
  2. அது ஒரு குழுப் பதிவாக இருக்கலாம்
  3. அல்லது மிக அதிக இடுகைகள் கொண்ட பதிவாக இருக்கலாம். (ஆயிரத்துக்கும் மேற்பட்ட இடுகைகள் அல்லது பின்னூட்டங்கள்)
  4. சில நாட்கள் முன்பு, பிளாக்கர் உங்களைப் பீட்டாவுக்கு மாறுங்கள் என்று கெஞ்சிப் பார்த்து சோர்ந்து போயிருக்கலாம்.

மனம் சோர்ந்துவிடாமல் புதிதாக ஒரு பீட்டாப் பதிவைத் திறந்து அதில் உங்கள் சோதனைகளைச் செய்து பார்க்கலாம். பின்னாளில் இந்தப் புதுக் கணக்கை பழைய ப்ளாக்கர் கணக்குடனும் சேர்த்துக் கொள்ள முடியும் என்கிறார்கள் பிளாக்கர் ஆட்கள்.

ஆக, பிளாக்கர் பீட்டா மிக மிக வசதியான, சுலபமான வலைப்பதிவுச் சேவையாகத் தான் இருக்கிறது. பீட்டாவுக்குத் தைரியமாக மாறலாம், முயற்சியைக் கைவிடாமல் தமிழ்மணத்தில் சொல்லி அதைச் சேர்த்துக் கொள்ளச் சொல்லலாம்.

மேலே குறிப்பிட்டுள்ள ஒருசில பிரச்சனைகளைத் தவிர பிளாக்கர் பீட்டா நன்றாகவே வேலைசெய்கிறது. 'எப்படியும் பீட்டா முழுமையான கட்டுமானத்துக்குப் பின், எல்லாச் சோதனைகளுக்கும் பின்னர் நடைமுறைக்கு வரத்தான் போகிறது. அப்போது புது பிளாக்கருக்கே மாறிக் கொள்கிறோம். இப்போது சோதனை எலிகளாக விரும்பவில்லை' என்றாலும், அதுவும் சரிதான்.

பழைய பதிவுகளோடு விளையாட பயமாக இருந்தால், பீட்டாவில் புதுக் கணக்குத் தொடங்கிச் சோதித்துப் பார்க்கலாம். ஆக, புகுந்து விளையாடுங்க..

[பிகு: கட்டுரைக்குத் தகவல் திரட்ட உதவிய பயனர்கள் இட்லிவடை மற்றும் செந்திலுக்கு நன்றி]

37 comments:

ramachandranusha(உஷா) said...

ஏதோ புரிகிறா மாதிரியும் இருக்கு, ஆனா யோசிச்சிப்பார்த்தா ஒண்ணுமே புரியலை. நான் இப்படியே
இருந்துவிடுகிறேன். இதுல சிவகுமார், லேடிஸ் எல்லாம் தினமும் விதவிதமாய் தங்கள் பக்கங்களை மாற்றி அழகுப்படுத்துகிறார்கள் என்கிறார். சரிதான் நம்ம பதிவெல்லாம் பார்க்கிறது இல்லை என்று
நினைச்சிக்கிட்டேன்

பொன்ஸ், சமர்த்தாலய் அழகாய் உருப்படியாய் எழுதியதற்கு நன்றியும், வாழ்த்துக்களும் :-)

Anonymous said...

பொன்ஸ், மிகச் சமீபத்தில் பீட்டாவிற்குமாறி அவதிப்பட்டவர்களில் நானுமொருவன். உங்களுக்கும் தெரியும். முதலில் எனது செய்தியோடை குழப்பத்தால் இடுகைகளை தமிழ்மணத்தில் சேர்க்கமுடியவில்லை. பின்னர், பதிவுப்பட்டைக் கருவியை இணைக்கமுடியவில்லை. அதன்பின் அண்மையில் மறுமொழியாக்கபட்ட இடுகைகளில் என்பதிவுகள் வரவில்லை. கடைசியாக இடுகைகளில் என் பெயர் தெரியவில்லை. நல்லவேளையாக இவை ஒவ்வொன்றையும் தமிழ்மண நிர்வாகிகள் என் முறையீட்டிற்கு மதிப்பளித்து சரி செய்து கொடுத்தார்கள். தற்போது என் வலைப்பதிவு எந்தப்பிரச்சனையும் இல்லமல் உள்ளது. ஆயினும், நான் இன்னும் பீட்டா தரும் மற்றைய சேவைகளை, நான் முன்பு அனுபவித்த சிக்கல்கள் கருதி, பயன்படுத்திப் பார்க்கவில்லை. நான் கணினி வல்லுனன் இல்லை ஆதலால், எனக்கு பீட்டா மிகுந்த சிரமத்தைத் தந்துவிட்டது.

Anonymous said...

அக்கா, உருப்படியாக ஒன்று எழுதிவீட்டீர்கள், பிடியுங்கள் சபாஷ்.

Sridhar V said...

பொன்ஸ் அவர்களே,

நல்ல உபயோகமான பதிவு. குறித்து வைத்துக் கொள்ள வேண்டிய பதிவு.

மிக நன்றி!

பொன்ஸ்~~Poorna said...

//நான் இப்படியே இருந்துவிடுகிறேன்//
உஷா, இப்படியே இருக்கலாம், எல்லாம் ஒரு வழிக்கு வந்தவுடன் அவர்களே நம் பதிவுகளை பீட்டாவுக்கு மாற்றி விடுவார்கள், அப்போ கூட இதெல்லாம் பார்த்துக்கலாம் :)
//சமர்த்தாய் அழகாய் உருப்படியாய் //
:)) நன்றி :)

//மிகச் சமீபத்தில் பீட்டாவிற்குமாறி அவதிப்பட்டவர்களில் நானுமொருவன்//
தங்கவேல், உங்களை மாதிரி 'தியாகிகளால்' தான் ஔஅடுத்தடுத்து பீட்டாவுக்கு மாறிக் கொண்டிருப்பவர்களுக்கு இத்தனை பிரச்சனைகள் இருப்பதில்லை ;)
இப்போதும் பிரச்சனைகள் இருந்தால் சொல்லுங்கள், என்னவென்று பார்க்கலாம்..

//அக்கா, உருப்படியாக ஒன்று எழுதிவீட்டீர்கள், பிடியுங்கள் சபாஷ்//
அருண், சர்டிபிகேட்டுக்கு மிக்க நன்றி! :)

நன்றி ஸ்ரீதர்.

Anonymous said...

பிளாக்கர் பீடாவா!

வந்துட்டேன்!

ஆவி அண்ணாச்சி said...

நட்சத்திர வாரத்தில் முதல் பதிவே டெக்னிக்கல் விஷயமா?

வாழ்த்துக்கள்!

இந்த வாரம் டெக்னிக்கல் வாரம்!

Anonymous said...

தாயீ,

மனுசனுக்குப் புரியுற மாதிரி எதுவும் எழுதக்கூடாதுன்னு நெனச்சிருக்கீங்களா?பெரிய நவீன கவிதாயினினு நெனப்பா?

நல்லா இருங்க!

நமக்கு பீடா வெத்தலையெல்லாம் வேணாம். என்னைக்காவது ஓய்வா இருக்குற நேரத்துல யாராவது எனக்கு மாத்தி தருவாங்க. அப்ப மாறிக்கிடுதேன்

சாத்தான்குளத்தான்

தருமி said...

அட என்னங்க இது? எல்லோரும் நட்சத்திரமானதும் முதல் பதிவில் ஒரு சுயபுராணம் பாடி, அவங்களுக்கு அதுக்கு நன்றி, இவங்களுக்கு இதுக்கு நன்றின்னு ஒரு பாட்டம் பாட்டு பாடுவோம். நீங்க என்னடான்னா, சடால்னு வந்து டெக்னிகல் பதிவோடு ஆரம்பிச்சிட்டீங்க...

அதுசரி, பொன்ஸுன்னா எங்களுக்கெல்லாம் தெரியுமே..பிறகு எதுக்கு மத்ததெல்லாம்...

எப்படியோ வாழ்த்துக்களைப் பிடிச்சிக்கிங்கோ..

முத்துகுமரன் said...

டீச்சர் பாடம் படா பெர்சாகீது ..

பொறூமையா படிச்சு சோதிச்சு பாக்கணும்

கஞ்சா கருப்பு said...

There seems to be difficulty for beta bloggers in commenting to blog posts of non-beta bloggers.

Mohd. Yunus

சின்னக்குட்டி said...

வணக்கம்..பொன்ஸ்... உங்களுக்கு இந்த சின்னக்குட்டியின் நட்சத்திர வாழ்த்துக்கள்...

நல்ல பிரயோசமான கட்டுரையோடை தொடங்கி இருக்கிறியள்....கலக்குங்க... இந்த வாரத்தை...

தருமி said...

டீச்சர் பாடம் படா பெர்சாகீது ..



இப்படி சொல்றது முத்துக் குமரன். நான் சொல்றது: பொறூமையா படிச்சு பீட்டாவிடமிருந்து விலகி இருக்கணும் - தற்காலிகமாவது..

பாடம் பெருசோ இல்லியோ...நல்லா புரிஞ்சிது.
நன்றி.. சின்ன டீச்சர்

thiru said...

இந்த பாடத்த படிச்சு நான் பாசாயிடுவேனா? :)

நல்ல பயனுள்ள பதிவு பொன்ஸ்

பொன்ஸ்~~Poorna said...

//பிளாக்கர் பீடாவா! வந்துட்டேன்! //

மறந்திட்டேனே அம்மணி, ஆவி வந்த உங்க ப்ளாக்கைப் பற்றி எழுதாம விட்டுப் போச்சே!

//இந்த வாரம் டெக்னிக்கல் வாரம்! //

அப்படியெல்லாம் இல்லைங்க ஆவி அண்ணாச்சி,

//பெரிய நவீன கவிதாயினினு நெனப்பா?//

ஆசிப் அண்ணாச்சி, ஹி ஹி

// நீங்க என்னடான்னா, சடால்னு வந்து டெக்னிகல் பதிவோடு ஆரம்பிச்சிட்டீங்க...
//
தருமி, அப்படியும் ஒரு பதிவு போட்டேன், தமிழ்மண நட்சத்திரப் பட்டியலில் காணாமல் போயிடுச்சு :(

//பொறூமையா படிச்சு சோதிச்சு பாக்கணும் //

முத்துகுமரன், பொறுமையா படிங்க.. கடைசி நாள் டெஸ்ட் வச்சாலும் வச்சிடுவேன் ;)

//There seems to be difficulty for beta bloggers in commenting to blog posts of non-beta bloggers//

நானும் பீட்டா பயன்படுத்திக் கொண்டிருக்கிறேனே. இந்த மாதிரி பிரச்சனைகளை அனுபவித்ததில்லையே யூனுஸ்?

//நல்ல பிரயோசமான கட்டுரையோடை தொடங்கி இருக்கிறியள்....கலக்குங்க... இந்த வாரத்தை... //

நன்றி சின்னக்குட்டி..

Anonymous said...

நான் மிகப் பாதிக்கப்பட்டவன்;பலர் உதவ வந்துள்ளனர்.(குமரன்;மலைநாடர்;பகீ) பார்ப்போம்.இதற்கு கணணி அறிவு சொற்பம் இருந்தே!!ஆக வேண்டும்.எனக் அது இல்லை.
எனினும் உங்கள் பதிவு,ஆறுதலையும் நம்பிக்கையையும் தந்தது.
யோகன் பாரிஸ்

குமரன் (Kumaran) said...

வாழ்த்துகள் விண்மீனே!!!

Unknown said...

இவ்வார நட்சத்திரத்திற்கு வாழ்த்துக்கள்...

பீட்டாவில் சோதனை செய்துவிட்டு
கேள்விகளுடன் வருகிறேன் :)

மா சிவகுமார் said...

பயனுள்ள கட்டுரை. பீட்டா பிளாக்கர் பற்றி பல விபரங்களைத் தெளிவு படுத்தியது. என்னுடைய ஒரு கணக்கை அதற்கு ஏற்கனவே மாற்றி விட்டேன். நீங்கள் சொன்ன வசதிகளை முயற்சித்துப் பார்க்கிறேன்.

நன்றி. நட்சத்திர வாரத்தில் இது போல சூரியனாகக் கட்டுரைகளை வழங்கும் ஆரம்பமே அருமை.

அன்புடன்,

மா சிவகுமார்

Sivabalan said...

நட்சத்திர பதிவுகளுக்கு வாழ்த்துக்கள்!!

G.Ragavan said...

இப்போதைக்கு பீட்டாவுக்கு பீடா போடப் போறதில்லை. நேரப்பத்தாக்குறை மட்டுமல்ல..பழைய பதிவுகளையும் பின்னூட்டங்களையும் முதலில் சேமிக்கனும். அப்புறந்தான் பீட்டாவும் காப்பி லோட்டாவும். உங்களைப் போலத் துணிந்த பின் மனமே துயரங் கொள்ளாதேன்னு இருக்க முடியலையே!

இலவசக்கொத்தனார் said...

சரி. வெயிட் பண்ணறேன். எல்லா பூச்சியையும் சரி பண்ணுங்க. அப்புறம் மாறிட்டா போகுது. என்ன அவசரம்?

சிறில் அலெக்ஸ் said...

நட்சத்திர வாரத்துக்கு வாழ்த்துக்கள். தொழில் நுட்பத்துடன் ஆரம்பித்து எங்கேயெல்லாம் போகப் போறீங்கன்னு காத்திருந்து பார்ப்போம்.

Boston Bala said...

தற்போதைய நிலையில் என்னுடைய வாக்கு: வோர்ட்பிரெஸ்.காம் (New here? « WordPress.com)

1. ப்ளாகரை விட துரிதகதியில் பிரச்சினைகளை கவனித்து தீர்வளிக்கிறார்கள். தனி மடலில் பதில், உதவி மையத்தில் கை கொடுத்தல் என்று புதியவர்களுக்கும் தொழில் நுட்பத் தகராறுகளுக்கும் உடனடி உபசரிப்பு.

2. கூகிள்.காம் ஆசியுடன் லேபிள்/tag, தேடல்களில் இடம்பிடிக்கிறது. பல்லாயிரக்கணக்கான tagகளை ஒருங்கிணைப்பதன் மூலமாக, லட்சக்கணக்கான பதிவுகளை கோர்வையாக ஒரு சேர படிக்கும் வாய்ப்பு கிடைக்கிறது.

3. நிரந்தரமாக இருக்க வேண்டிய பக்கங்களை உருவாக்குதல், அதிகம் பார்வையிடப்பட்ட பதிவுகளை முன்னிறுத்துதல் போன்றவை எளிதாக இணைத்து, வாசகரை கவரலாம்.

புதிதாக ப்ளாகர் பீட்டாவில் துவங்குவதை விட, வோர்ட்ப்ரஸ் கொண்டு ஆரம்பிப்பதற்கே என்னுடைய வோட்டு.

VSK said...
This comment has been removed by a blog administrator.
கால்கரி சிவா said...

பொன்ஸ்க்கு நட்சத்திர வாழ்த்துக்கள்


எஸ் கே சார், நீங்கள் கேட்ட கேள்வி ஒன்றும் கம்பசூத்திரம் அல்ல அந்த இலவச ப்ரோகிராமிற்கு செல்ல இங்கே கிளிக்கவும்

பொன்ஸ் சாரி உங்க வீட்டுக்கு வந்து உங்களுக்கு பதிலா நான் பதில் சொல்றேன்

Kannabiran, Ravi Shankar (KRS) said...

யான் பெற்ற இன்பம்
பெறுக இவ் வையகம்
அப்படின்னுட்டு ப்ளாக்கர் பீட்டா பற்றி அலசி ஆராய்ந்து பரிந்துரைகள் வழங்கி இருக்கீங்க! நன்றிங்க பொன்ஸ்!

பீட்டாவுக்கு மாறும் முன், பழைய பதிவுகளையும், பின்னூட்டங்களையும் சேமிப்பது எப்படி (backup) யாராச்சும் சொல்லுங்களேன்! எல்லாருக்கும் பயனுள்ளதாய் இருக்கும்!

VSK said...

தங்க விண்மீனுக்கு வாழ்த்துகள்!

:):):)

உங்கள் முகப்பு என்னை ஒரு கணம் உறையச் செய்து விட்டது!


................

என்னைப் பற்றிய குறிப்புகள்!

எப்படி அது சாத்தியமானது?

மற்றவருக்கும் இது போலவே வருமா?

ஒரே மர்மம்!

Unknown said...

பொன்ஸ்

நட்சத்திர வாழ்த்துக்கள்.முதல் நட்சத்திர பதிவு மிக பயனுள்ளதாக இருந்தது. பீடாவை பயன்படுத்தி பற்றி இனி சோதித்து பார்க்கிறேன்.

இந்த வாரம் மிகவும் நல்ல நட்சத்திர வாரமாக அமைய வாழ்த்துக்கள்

இன்பா (Inbaa) said...

பா பா ...
'அடைப்பலகையில்' மாற்றம் செய்யும் வசதி மட்டும் இருந்தால் வோர்ட்பிரஸ் எல்லோரையும் தூக்கி சாப்பிட்டு விடும்.

சுதந்திரம் மட்டும் இல்லாமல் சொர்க்கமே இருந்தும் என்ன பயன்?

துளசி கோபால் said...

'எனக்கும்' கொஞ்சம் புரிஞ்சது. ஆனால்..............
செஞ்சுபார்க்கத் துணிவில்லாம 'கோழை'யா இருக்கேன்.
அப்புறம் பார்த்துக்கிடலாம்............ பொழைச்சுக்கிடந்தா:-))))

பொன்ஸ்~~Poorna said...

//கணணி அறிவு சொற்பம் இருந்தே ஆக வேண்டும்.//
அப்படி இல்லை யோகன், ஒரு முறை மாற்றிக் கொண்டால், அப்புறம் அது மிகச் சுலபம் தான்..

நன்றி குமரன்

//பீட்டாவில் சோதனை செய்துவிட்டு
கேள்விகளுடன் வருகிறேன் //
வாங்க அருட்பெருங்கோ..

நன்றி சிவகுமார், வைசா, சிவபாலன்..

//பழைய பதிவுகளையும் பின்னூட்டங்களையும் முதலில் சேமிக்கனும்//
ராகவன், பதிவுகள் சுலபமா சேமிக்கலாம், பின்னூட்டங்களைச் சேமிப்பதெப்படின்னு தெரியலை.. தெரிஞ்சால் சொல்லுங்களேன்.

//என்ன அவசரம்?//
அதானே.. கொத்ஸ், நான் மாற்றணும்னு பார்த்தேன், ஆனால் பிளாக்கர் என்னை பிளாக் பண்ணி வச்சிருக்கு :(

//தொழில் நுட்பத்துடன் ஆரம்பித்து எங்கேயெல்லாம் போகப் போறீங்கன்னு காத்திருந்து பார்ப்போம்//
ஆஹா.. பயம்ம்ம்மா இருக்கே சிறில் :))

//புதிதாக ப்ளாகர் பீட்டாவில் துவங்குவதை விட, வோர்ட்ப்ரஸ் கொண்டு ஆரம்பிப்பதற்கே என்னுடைய வோட்டு.
//
பாபா, வோர்ட்பிரஸ்ஸும் துவங்கிப் பார்த்தேன். ஆனால் இன்பா சொல்லுவது போல் வார்ப்புரு மாற்ற முடியாத வலைப்பதிவு சேவை இருந்தென்ன லாபம்? :(

// உங்க வீட்டுக்கு வந்து உங்களுக்கு பதிலா நான் பதில் சொல்றேன்//
கலக்குங்க..:) பதில் சொன்னதுக்கு நன்றி ஆனா சுட்டியில் பிரச்சனை. எஸ்கே, இங்கே பாருங்க..

//பீட்டாவுக்கு மாறும் முன், பழைய பதிவுகளையும், பின்னூட்டங்களையும் சேமிப்பது எப்படி (backup) யாராச்சும் சொல்லுங்களேன்!//
krs, பின்னூட்டங்கள் சேமிப்பது எப்படின்னு தெரியலை. பதிவைப் படியெடுத்து வைத்துக் கொள்ளலாமே..

//இந்த வாரம் மிகவும் நல்ல நட்சத்திர வாரமாக அமைய வாழ்த்துக்கள்//
நன்றி செல்வன் :)

//'எனக்கும்' கொஞ்சம் புரிஞ்சது/
ஆஹா.. நன்றி துளசி அக்கா.. ஏதோ கணினி மொழியிலேயே எழுதி படிக்கிறவங்களை ரொம்ப குழப்பிட்டனோன்னு ஒரு சந்தேகம் இருந்தது. அப்படி இல்லைன்னு நிவர்த்தி செய்ததுக்கு உங்களுக்கு ரொம்ப ரொம்ப நன்றி :)))

Anonymous said...

Congrats for Star of the Week

-"Farmer" ILA

Anonymous said...

அன்புள்ள பொன்ஸ்,

நீங்கள் எனக்கு உதவி செய்யாமலிருந்தால் ப்ளாக்கராவது பீட்டாவாவது? "ப்ளாக் லாக்கருக்குள்ள பூட்டாம்பா"ன்னு விட்டுருப்பேன்...Thanks to your help....இப்ப ப்ளாக்குகிறேன்...

இப்ப இந்த Technical பதிவு!!!!! எளிய இணிய நடையில்....Really நீங்க தாரகைதாங்க....Keep up the good work and wish you well.

Machi said...

உங்க பதிவை படிச்சதுக்கப்புறம் பீடாவுக்கு மாறும் எண்ணம் இல்லை. பொறுத்திருக்கறேன். தேவையான பதிவு நன்றி.

பொன்ஸ்~~Poorna said...

நன்றி இளா, அகத்தீ, குறும்பன்

பதிவு புரிஞ்சதுன்னு சொன்னதுக்கு ஒரு சிறப்பு நன்றி அகத்தீ :))

ஒப்பாரி said...

நான் பீட்டாவில் பதிவு செய்திருக்கிறேன், ஆனால் என்னால் தமிழ்மனத்தின் கருவிப்பட்டையை நிருவ முடியவில்லை,உதவ முடியுமா?