கனவு மெய்ப்பட வேண்டாம் :)

சாலையில் ஏதோ சுவையான நினைவில்
நடுவினில் வந்தேன்; ஐயகோ உணர்ந்தேன்!
எதிரிலே எமனார் இயந்திர மாகி
எதிர்ப்பது கண்டு எனைநிறுத் திட்டேன்

"வீட்டினில் சொல்லிநீ வருவாய்" என்று
ஓட்டுனன் திட்ட ஓரமாய் வழிந்தேன்.

இக்கணம் அந்தச் சாலைசெய் வண்டி
என்னுடை மோட்டார் வாகனம் தன்னில்
தன்குணம் காட்டிச் சென்றிருந் தாலோ
என்நிலை என்ன? எழுந்தது கேள்வி!!

உடலெலாம் சிதைந்து உள்ளம் மட்டும்
உயர்ந்தோர் கூற்றினை ஒத்து வெளியில்
அலைந்திருப் பேனோ ஆவி என்று?

இலையென சொல்லியும், உளதென ஒத்தும்
உளைந்த-அக் கடவுள் குலம்காண் பேனோ?

கொள்கைக் காக உயிரினை விட்ட
பல்வகைத் தலைவரோ டுறைந்திடு வேனோ?

பலமுறை கேட்டும் புரிப டாத
நியூட்டனின் நல்ல சித்தாந்தம் தன்னை
அவரையே கேட்டு ஐயநீங் குணர்ந்து
அதனின்நன் மைகளை அறிந்திடு வேனோ?

இதுவரை செய்யாக் கணக்கென எந்தன்
பாவபுண் ணியங்கள் கணக்கிடு வேனோ?

நெஞ்சமும் நினைவுஞ் சிந்தனைக் குதிரையில
்வஞ்சனை யின்றி சவாரி புரிய
கொஞ்சம்நான் எந்தன் பழைய உலகில்
கால்களைப் பதித்தேன் கதறித் துடித்தேன்

முன்னால் முழுமை வேகத் துடனே
வந்தது பெரிய சரக்குப் பேருந்து
எந்தன்சிறு வண்டி கண்ணில் படாமல்
முந்திவந் தென்மேல் மோதிய தாமே!!!

அடடே என்னுடல் கீழே இருக்க
அந்தரத் தில்நான் பறப்ப தெங்கே?!!

ஆங்கோர் சாலையில் ஆலாய்ப் பறந்தவள
்கிங்கர மாரிடை கிளம்புவ தெங்கே?

இத்தரை மீது உன்னுடை வாழ்வு
இத்துடன் முடிந்தது வருவாய் வானிற்கு
என்றவன் கூறலும் என்னுயிர் கலங்கி
மயங்கியே நிற்றலு மெய்யா? பொய்யா??


இது சின்ன வயதில், வெண்பா, ஆசிரியப்பா எல்லாம் கற்றுக் கொண்ட காலத்தில், ஆசிரியப்பா என்று எண்ணி எழுதியது..

தளைக்குற்றம், சொற்குற்றம் ஏதாவது இருந்தா please சொல்லுங்க