நான் ஏன் மாற்றினேன்?

தமிழ் மணத்தில் இப்போது பொதுவாக "படம் மாற்றும் காலம்". எல்லாரும் தங்கள் ப்ரொபைலில் புகைப்படங்களை மாற்றிக்கொண்டே இருக்கிறார்கள். 'சரி, ஊரோடு ஒத்துவாழ்' என்று நானும் படம் மாற்றுவது என்று முடிவெடுத்தேன்.

ஏற்கனவே எங்கள் சங்கப் பலகையில் என் படத்தை போட்டுவிட்டதால் யாரேனும் ஆட்டோ, ப்ளேன், சைக்கிள் அனுப்பும் முன் என்னுடைய படை பலத்தை ஒரு படமாகப் போட்டு 'பட'பலமாக்கிக் கொள்ளலாம் என்று எண்ணம்.

என்ன போடலாம் என்று யோசித்த போது எனக்கு நினைவுக்கு வந்தது யானை தான்..

"யானை யானை அழகர் யானை அம்பாரி யானை .." என்று பாடிய காலத்திலிருந்து எனக்கு யானை என்றால் ஒரு பாசம்.(முழுப் பாட்டும் நினைவில்லைங்க.. இது மட்டும் தான் இருக்கு.. ). இவ்வளவு பெரிய மிருகத்தை எப்படிப் படைத்திருக்கிறான் என்று கொஞ்சம் ஆச்சரியமும் உண்டு. அதிலும் ஆப்பிரிக்க நாட்டு யானைகளின் சில படங்களைப் பார்த்து விட்டு வியப்பு பலமடங்காகி விட்டது.

என்னிடம் தொட்டுத் தொட்டுச் சேர்த்த, யானை படம் போட்ட புத்தகம், டைரி, துணிமணி, கர்சீப் என்று நிறைய உண்டு. ஏன், சமீபத்தில் மதுரை போனபோது யானை படம் போட்டிருக்கிறது என்ற ஒரே காரணத்திற்காக பயனே இல்லாமல் ஒரு 'மஞ்சள் பை'யையும் வாங்கி, அதை அமெரிக்கா வேறு எடுத்து வந்தேன். யானை பொம்மைகள், மண், பஞ்சு, மார்பிள், செம்பு எல்லா மூலப் பொருளிலும் சேர்த்து ஒரு 100க்கு மேல் இருக்கும்(துளசி அக்கா பக்கத்துல வர முடியுமா? ம்ஹும்..!! ). இதுவரை சென்று வந்த எல்லா ஊர்களிலும் ஒரு யானை வாங்கியே இருப்பேன்(அட! பொம்மை தாங்க :)). என் அம்மாவுக்கும் யானை பிடிக்கும் என்பதால், ஊர் விட்டு ஊர் வரும்போது எந்த யானை யாருக்குச் சொந்தம் என்று வேறு ஒரு இழுபறி நடக்கும்.

சின்ன வயதில் எனக்கிருந்த "வாழ்க்கை லட்சிய"ங்களில் ஒன்று யானை வளர்ப்பது. ஒரு யானையை வாங்கி வீட்டில் வைத்து வளர்க்க வேண்டும்.. எம்ஜியார் படத்தில் நாலு யானைகளை வைத்து வளர்த்ததைப் பார்த்த பின் (படம் பேரு என்னங்க?) எனக்கு இது நிச்சயம் நடக்கக் கூடியது தான் என்னும் நம்பிக்கை வந்து விட்டது.

வயதாக ஆக, என் அப்பாவைப் போட்டு பிடுங்கிக் கொண்டே இருந்ததில் "யானை எல்லாம் வாங்கித் தர முடியாது.. வேண்டுமானால் இதை வைத்துக் கொள்" என்று பூனை வளர்க்க அனுமதி கிடைத்தது.

இப்போது சொந்தமாக சம்பாதிக்க ஆரம்பித்த பின் யானை வளர்க்கும் ஆசை அறவே போய்விட்டது.

முதல் காரணம், யானையைக் கட்டும் அளவுக்கு பெரிய வீடு வாங்குவது என்பதே கேள்விக் குறி.

அடுத்து, யானையும் பாவம். காட்டில் நிம்மதியாக இருக்கும் அதை என் ஒருத்தியின் ஆசைக்காக பிடித்து வந்து, வளர்த்து, அது இயல்பாக சாப்பிடாமல் நம்மை எதற்கெடுத்தாலும் எதிர்பார்த்து.. ம்ஹும்.. இதெல்லாம் ஒத்துவராது..

உஷாவின் குதிரையைப் பற்றி பேசும்போது, யானை ரொம்ப சோம்பேறி என்று ஒரு கருத்து வந்தது. யானை படம் போடுவது என்று முடிவு செய்த போது, நம்ம சுறுசுறுப்புக்கு(??!) அடக்கமான யானை போதாது என்று முடிவு செய்து ஓடும் யானையைத் தேடிப் போட்டேன். யானை எப்படி?

கொட்டும் பொன்னி(ஸ்)ன் ரசிகர்களுக்காக, இறுதியாக ஒருமுறை :

இப்போவே அள்ளிக்குங்க..

போனா வராது, பொழுது போனா கிடைக்காது :)

புது யானை.. மாற்றிக் கொண்டே இருப்பதால், இங்கே பதிக்கிறேன்..