மட்டுறுத்தல் நண்பன் - நண்பனா? எதிரியா?

பொதுவாக நான் பதிவுகளில் டெக்னிகல் சமாச்சாரங்கள் பேசுவதில்லை. தொழில் முறையில் தினசரி பயன்படுத்தி வரும் விஷயங்களை வலைப்பதிவுகளிலும் பேசுவது எனக்கு ரொம்பவும் அலுப்பான ஒன்று. ஆனால், நேற்று வழக்கம் போல எல்லா வலைப்பதிவுகளுக்கும் போய் வந்து கொண்டிருந்தபோது, திரு மகேந்திரனின் பதிவில் மட்டுறுத்தல் செயலியைப் பற்றி கேள்வி எழுப்பி இருந்தார். அதற்கு டுபாக்கூர் என்பவரும் பின்னூட்டமிட்டு அன்னியலோகத்தைப் பற்றிய தன் 'உறுதியான சந்தேகங்களை'ச் சொல்லி இருந்தார்.

ரமணி தன்னளவில் அதற்கு பதில் சொல்லி விட்டார் என்ற போதும் எனக்கு இன்னும் கொஞ்சம் சுலபமாக இதை விளக்கிச் சொல்லலாமே என்று தோன்றியது. அதன் விளைவே இந்தப் பதிவு.

ரமணியின் மட்டுறுத்தல் நண்பன் செயலியை அன்னியலோகம் என்னும் பக்கத்தில் இருந்து பயன்படுத்தலாம். மட்டுறுத்தல் நண்பன், மூன்று வெவ்வேறு உதவிகளைச் செய்கிறான்

* பரிசீலித்து மட்டுறுத்தல் ஆலோசனைகளை மட்டும் வழங்கு (show suggestions only)
* தன்னியக்க நிராகரித்தல் மட்டும் (autoreject only)
* தன்னியக்க பிரசுரித்தல் மற்றும் நிராகரித்தல் (autopublish and autoreject)

இது எல்லாவற்றிற்கும் தேவை உங்கள் ஜிமெயில் பயனர் பெயர் மற்றும் கடவுச் சொல். இரண்டாவது மற்றும் மூன்றாவது வசதிகளைப் பயன்படுத்த மட்டுமே உங்கள் ப்ளாக்கர் பயனர் பெயரும் கடவுச் சொல்லும் தேவை.

பரிசீலித்து மட்டுறுத்தல் ஆலோசனைகளை மட்டும் வழங்கு (show suggestions only)
நிங்க் இணையதளம் மட்டுறுத்தல் செயலிக்கு ஒரு செய்தியோடையைக் கொடுக்கிறது.. அதாவது லைப்ரரி என்கிறோம். நிங்கில் உங்கள் ஜிமெயில் பயனர் பெயரையும் கடவுச் சொல்லையும் கொடுத்தால், அந்த மெயில் பாக்ஸினுள் நுழைந்து ஒவ்வொரு பின்னூட்ட மெயிலாக எடுத்து நோட்டம் விட்டு அந்த பின்னூட்டம் உங்களுக்கு அனுப்பியவர் தமிழ்மணத்திலோ தேன்கூட்டிலோ இருப்பவர் தானா, இல்லையா என்பதைக் காட்டுகிறது..(தமிழ்மணத்தில் இருப்பவர் பற்றிய விவரங்களை வெண்பட்டியலாக ரமணி தனியாகச் சேகரித்து வைத்துள்ளார்) அப்படி இருக்கும் பட்சத்தில் அந்த பின்னூட்டத்தை அனுமதிக்கவும், இல்லாத போது அதை அனுமதிக்காமல் மறுக்கவும் இது பரிந்துரைக்கிறது.

மற்ற இரண்டு ஆப்ஷன்கள் அப்படி அனுமதிக்கக் கூடிய பின்னூட்டங்களை அனுமதிப்பதற்கும், சரியில்லை என்று கருதப்படும் பின்னூட்டங்களைத் தானே ரிஜக்ட் செய்வதற்குமானவை.

இந்த இரண்டு ஆப்ஷன்களுக்குத் தான் ப்ளாக்கர் பயனர் பெயரும் கடவுச் சொல்லும் தேவை. முதல் ஆப்ஷனுக்குத் தேவை இல்லை.

அடுத்தது, டூபாக்கூர் வைத்த முக்கிய குற்றச் சாட்டு,
//அங்கு சேரும் எல்லாரும் மெயில் முகவரியையும் அதன் பாஸ்வேர்டையும் கொடுத்தால் எல்லா பாஸ்வேர்டும் வெங்கட்ரமணிக்கு போய்ச் சேருகிறது. அதன்பிறகு வேண்டாதவர்களை (வலைப்பூக்களை) இந்த பேஸ்வேர்டு கொண்டு அழித்து விட முடியும்.//

இதுவரை விளக்கிய வகையில், முதல் ஆப்ஷனைப் பயன்படுத்த உங்கள் ப்ளாக்கர் ஐடி தேவையே இல்லை. வெறும் ஜிமெயில் ஐடியே போதும். அதுவும் புத்தம்புதிதாக, மட்டுறுத்தலுக்கு மட்டும் நீங்கள் துவங்கப் போகும் ஐடியே போதும். எனவே அதை வைத்து எதையும் அழிக்க முடியாது.. (அந்த ஜிமெயில் ஐடியைக் கூட அழிக்க முடியாது.. பாவம் ரமணி!! )

மற்ற இரண்டு ஆப்ஷன்களை எடுத்துக் கொண்டோமானால், அவற்றில் ப்ளாக்கர் பயனர் பெயர் கொடுக்கப் படுகிறது. இந்தப் பெயரை அந்தப் பக்கத்தை மூடும் வரை வலைஉலாவிகள்(Browser) நினைவில் வைத்துக் கொள்கின்றன.

இதில் தோன்றக் கூடிய சந்தேகங்கள் இரண்டு:
1. கொடுக்கப்படும், நினைவில் வைக்கப்படும் இந்த கடவுச் சொல்லை எப்படிப் பயன்படுத்துகிறார்கள்? எங்காவது தேக்கி(store) வைக்கப்படுகிறதா?(அப்புறமேட்டு ரமணி எடுத்துக்கிடத் தான் :) )
2. நினைவில் வைக்கப்படும் கடவுச் சொல்லை வேறு யாராவது நிங்கிலிருந்து எடுத்தால் என்ன செய்வது?

பதில்கள் சுலபம் தான். நீளமாகப் போய்விட்டதால், அடுத்த பதிவில் பதில்கள் தொடருகிறேன்.

ஒன்று மட்டும் சொல்லி இந்தப் பதிவை முடிக்கிறேன்.
இந்த மென்பொருளை உருவாக்க ரமணிக்கு ஆன பணச்செலவு அப்படி ஒன்றும் சொல்லிக் கொள்ளும் அளவுக்கு இல்லை என்ற போதும், மென்பொருளாளரின் வாழ்வில் கணினிக்கு அருகில் செலவிடாத ஒவ்வொரு மணித் துளியும் எத்தனை உபயோகமானது என்பது எல்லாருக்கும் தெரிந்திருக்கும். அதிலும் ரமணியின் வீட்டில் ஒரு புது வரவு வேறு வந்திருக்கும் சமயத்தில் இந்த அன்னியன் மென்பொருளுக்கு அவர் செலவு செய்த ஒவ்வொரு நிமிடமும் பெரிய முதலீடு தான். இது இலவசம் என்பதுடன், தேன்கூடு, தமிழ்மணம் போன்றவர்களால் விளம்பரம் செய்யப்பட்டும் இதை அதிகம் பேர் பயன்படுத்த முன்வராததுமன்றி, (டூபாக்கூர் போன்றவர்களால்) உருவாக்கியவரின் நோக்கத்தை கேள்விக்குரியதாக்கும் போது தான் அலுப்பாக இருக்கிறது.

வேறு கேள்விகள் இருந்தாலும் பின்னூட்டத்தில் சொல்லலாம்.